BUTUAN CITY – Giklaro ni Presidential Communications Operation Office kon PCOO Secretary Martin Andanar nga ang kawala pa’y gipagawas nga desisyon sa Regional Trial Court batuk sa mga akusado sa Maguindanao massacre ang hinungdan nga hangtud karon, apil sa Top 5 Most Dangerous Country for Jounalists ang Pilipinas.
Kini ang reaksyon ni Sec. Andanar sa pagsibog og usa ka buwan gikan sa orihinal nga eskedyol alang sa pagpagawas og desisyon subay na usab sa paghandom karong adlawa sa ikanapulo nga anibersaryo sa ngilngig nga massacre nga mikalas og 58 ka mga tawo apil na ang 32 ka mga tigbalita.
Sa eksklusibong pakighinabi sa Bombo Radyo Butuan, gipadayag ni Andanar nga wala gikalipay sa Malakanyang ang pag-uktaba sa pagpakanaog na unta og desisyon batuk sa mga akusado tungod kay mi-abot na man og usa ka dekada ang paghulat sa mga kabanay sa biktima sa gila-uman nilang hustisya.
Gipasabot pa ni Sec. Andanar nga mas maayo na lang kini nga kalambuan kaysa ma-utro na usab ang pagpa-abot og laing napulo ka tuig sa mga kabanay sa mga biktima alang sa pagpagawas na og desisyon.
Gibutyag sa opisyal nga ang pagsibog base na usab sa hangyo sa huwis aron matimbang-timbang og maayo ang ipagawas nga desisyon partikular ang paghukom kung guilty ba o dili ang mga akusado ilabina ang pipila sa mga impluwensyadong kaliwatan sa mga pamilyang Ampatuans.
