BUTUAN CITY – Makita na ang bagang doot sa katawhan nga misalmot sa Santos nga Misa nga gipasiugdahan ni Manila Archbishop Jose Cardinal Advincula isip pagsugod sa kapistahan sa itom nga Nazareno.
Kaganinang alas 12:00 sa tungang gabii sa dihang gisugdan ang Misa Mayor nga gibana-banang gitambongan sa 140-mil ka mga deboto diha sa Quirino Grandstand. Kini base na usab sa gipagawas nga datus sa Manila Public Information Office.
Kagabii alas 9:00 ang takna sa dihang gisugdan na ang pagsirado sa 15 ka mga kadalanan alayon na sa kasamtangang ruta sa traslacion.
Ang isiradong mga kadalanan gilangkuban sa main roads sa siyudad sa Roxas Boulevard, Taft Avenue, og Recto Avenue samtang daghang mga alternatibong ruta usab sa mga sakyanan.
Nasayrang sukad pa niadtong 1787, sa matag Enero 9, ang mga deboto magdasok sa Quiapo Church sa Manila aron moapil sa procession nga gitawag og “Traslacion sa itom nga Nazareno.
Adiser pa ang kapistahan, liboan na ang deboto nga miapil sa Pahalik apan tungod sa sanitary concerns, gitambagan kini nga motrapo nalang og panyo. Sa karun nga traslacion lauman nga milyones nga mga deboto ang moapil.
Kini usab ang ikaduhang prosisyon sukad niadtong COVID-19 pandemic.
Sa nakalabay nga tuig, milungtad og 15 ka oras ang traslacion. Alayon niini, dunay panawagan si Alex Irasga, Technical Director sa Nazareno 2025 ngadto sa mga deboto nga himoong luwas ang prosisyon.
