BUTUAN CITY – Gikondena ni Ritchie Ravelo, presidente sa Person with Disability (PWD) Federation sa Butuan City, ang pagpusil-patay sa usa ka PWD ning syudad.
Sumala ni Ravelo, ang biktima usa ka polio victim nga migamit og wheelchair rason nga wala kini kapasidad nga manalipod sa iyang kaugalingon. Hangtud karon, wala pa masuta kung unsa ang tinood nga motibo sa suspek sa maong krimen.
Apan alang kang Ravelo, dili niya madawat ang gidangatan sa nasangpit nga indibidwal.
Nasayrang ang biktima, lumad nga taga-Davao ug temporaryo lamang nga nagpuyo ug nag-abang og balay sa may Port Poyohon ning siyudad. Gikatingala usab sa PWD Federation president kung ngano nga gipusil pa ang biktima nga wala man kini bawot.
Padayon pa ang imbestigasyon sa kapulisan aron masuta ang tinood nga motibo sa krimen ug madakpan ang responsable.
Panawagan ni Ravelo nga pabarugon ang hustisya alang sa biktima ug irespeto ang kinabuhi ug katungod sa mga persons with disability.
