BUTUAN CITY – Mikusog karon ang anggulo nga duna’y kutay sa trabaho isip hard-hitting nga komentarista ang motibo sa pagpusil patay sa station manager sa Prime Broadcasting Network kon Prime FM nga si Christoper Iban Lozada.
Sigon ni Joshua Tuyco – OIC program director sa maong sibyahan, wala’y laing init nga isyung gituki ang biktima sa iyang programang ‘Batikos ni Chris Rapido’ kondili ang ila lamang mayor nga si Librado Navarro.
Si Lozada matud pa ang nangusog sa pagpasaka og kaso batuk sa mayor ngadto sa Ombudsman tungod sa anumalusong pag-purchase sa dul-an 15-milyunes pesos nga hydraulic excavator kansa gikwestyon sa Commission on Audit.
Dugang ni Tuyco, sukad migawas ang desisyon sa Ombudsman nga nag-dismiss kang Navarro gikan sa iyang pagserbisyo, dinhi na matud pa nagsugod og dawat og death threat ang biktima.
Wala siya magdahom nga matinuod ang bahad nga nadawat sa ilang manager kansa gipaagi lang sa nadawat niining duha ka mga text messages kondiin gi-post kini sa Facebook account niini og gipa-blotter pa sa ilang police station.
Gani, malipayon pa silang nag-istorya kalabot sa mga isyu sa ilang siyudad ilabina ang kasong grave misconducts nga gi-atubang sa ilang mayor.
Nasayrang hangtud sa pagkutllo niini nga balita, naglingkod pa gihapon sa iyang posisyon si Mayor Navarro, hinungdan nga personal nga gisuta sa biktima ang pagpatuman sa dismissal order sa DILG-Caraga Regional Office dinhi sa dakbayan sa Butuan. (Beth Ruiz)
