BUTUAN CITY – Giklaro sa National Union of Journalist of the Philippines o NUJP nga dili dapat conditional ang pagpasulod sa mga media men sa Kingdom of Jesus Christ compound.
Kini human sa usa ka insidente diin gihanyagan sa kapulisan og access ang mga reporters sa mga search operations, ubos sa kondisyon nga mupirma sila og waiver o kaha mu-uyon nga himuong mga police witnesses.
Sa eksklusibong interview sa Bombo Radyo Butuan, gipadayag ni NUJP national chairperson Jonathan de Santos nga bisan og gikinahanglan ang mga reporters sa ground alang sa coverage sa mga panghitabo apan kinahanglan usab nga sabton ang kadelikado sa sitwasyon ilabina nga duna na’y ubang mga reporters ang na-harass rason nga dili feasible ang pagsulod sa mismong compound.
Gawas pa, dili angayang diktaran ang media men kung asa mupabor ilabina sa gusto sa kapulisan tungod kay sayod ang tanan nga anaa lang kita sa tunga nga dapig sa kamatu-uran.
