BUTUAN CITY – Nagpagawas og pamahayag ang rebelding New People’s Army kon NPA mahitungod sa ilang pag-angkon nga sila ang misunog sa duha ka truck nga gipanag-iyahan sa negosyante didtong dapita sa Trento, Agusan del Sur.
Mahinumduman nga bandang alas 11:00 sa buntag niadtong Marso 8 nahitabo ang pagdabdab sa usa ka elf truck ug parmol truck sa Barangay Manat sa maong lungsod. Unang gipakanaog ang driver niini nga si David Viscaya dayung sunog sa duruha ka sakyanan.
Sa gipagawas nga pamahayag sa nagpailang Ka Amihan Guerrero, Tigpamaba sa Bagong Hukbong Bayan – Agusan del Sur, igo lang matud nilang gisilotan ang tag-iya sa mga gisunog.
Kini base sa gibug-aton matud pa sa iyang kasong nahimo batok sa katawhan ug rebolusyonaryong kalihukan. (1) pagpangilog og yuta sa mga mag-uuma; (2) pagpasiugda sa illegal logging ug pagbutang og mga bansuhan sa lasangong bahin sa Brgy. Imelda ug Bunawan Brook, sakop sa lungsod sa Bunawan, Agusan del Sur; (3) kakunsabo ang kumpanya sa Agusan Plantation Oil Incorporated (API), gipig-otan ug gihikawan sa ilang mga batakang katungod ang mga mag-uuma ug nagapangolekta og porsyento ngadto sa mga mag-uuma sa ngalan sa NCIP; (4) pagtukod og mga asset nga aktibong moreport sa AFP/PNP ug nagapaniktik (nagapaniid) sa lihok sa Bagong Hukbong Bayan sa lugar.
Nagsilbi matud pa kining pahimangno o warning sa tanang langyaw nga kompanya, lokal nga agalong yutaan ug mga opisyal sa gobyerno nga nagahimo og kadaut ngadto sa katawhan sulod sa probinsya sa Agusan del Sur ug tibuok nasud.
