BUTUAN CITY – Emosyunal nga gibalik-lantaw ni kanhi Bombo Radyo reporter Felimon Balasabas ang iyang milagrusong kasinatian dihang mihapak sa ilang pinuy-anan sa Tacloban City ang bagyong Yolanda, insaktong upat ka tuig ang milabay kansa gihandom karong adlawa.
Iyang gisaysay nga lisod kalimtan ang pagka-anod nila sa tubig-dagat nga misulod na sa entiro siyudad ilabina nga uban sila sa iyang asawa, duha ka mga anak, ugangang babaye, ingon man sister-in-law og anak niini nga nadala sa unos.
Na-missing sa maong hitabo ang iyang ugangan og sister-in-law lakip na ang anak niini hinungdan nga milagro alang kaniya ang kaluwasan nilang tanang.
Dako ang iyang pagpasalamat sa laing kinabuhi nga ilang na-angkon kansa mugna matud pa sa hugot nilang pag-ampo gikan sa Kahitas-an.
Sa maong hitabo, usa lang ka dakong leksyon nga iyang nakat-unan og kini mao ang pagpangandam kanunay sa kinabuhi ilabina kung nagtuo kita og langit.
Gidugang ni Balasabas nga tungod sa ilang nasinatian, nakakat-on siya nga ipa-ambit sa uban ang grasyang madawat sa ilang pamilya tungod kay dili sayon ang kalipay nga bation niadtong mga tawong wala’y mahimo apan makadawat og tabang.
Gawas pa, ang kinabuhi sa tawo mubo lang hinungdan nga kinahanglan niining magpuyo nga subay sa kagustuhan sa Kahitas-an. (Beth Ruiz)
