BUTUAN CITY – Gihagit ni Congresswoman-elect Leila de Lima si kanhi Presidential spokesperson Harry Roque nga mupa-uli na sa nasud human kini nagpagawas og pamahayag nga misuporta sa ‘bloodbath’ statement ni Vice President Sara Duterte higayong himuon na ang impeachment trial batuk kaniya.
Una nang gibanatan ni de Lima ang pamahayag ni VP Sara nga gituyo matud pa aron makakuha og simpatiya ilabina nga nagkaduol na ang pagtaral kaniya. Wala matud pa’y lugar sa impeachment trial ang kagubot, ingon man drama tungod kay seryuso matud pa kining butang nga kinahanglang musunod sa due process.
Ang pamahayag ni VP Sara gisuportahan usab ni Atty. Harry Roque kinsa atua karon sa The Hague, Netherlands naghuwat sa resulta sa iyang gi-aplayang asylum.
Sa iyang gipagawas nga video, kung ania matud pa siya sa Pilipinas, bloodbath usab ang iyang gustong mahitabo.
Kini nga pamahayag giyam-iran usab ni de Lima dayong hagit kang Roque nga mupa-uli na kini sa nasud aron atubangon ang iyang kaso ug makita ang iyang ka-isog.
