BUTUAN CITY – Si Donald Trump na ang ikatulong US president sa history nga i-impeach sa House of Representatives, human gitakda ang pagtaral kaniya sa Senado aron pagsuta kung angayan ba siyang tangtangon sa pwesto.
Kini human gibotaran sa kamara nga gi-abusuhan sa presidente ang iyang gahom, ang usa sa duha ka mga impeachment charges batuk kaniya.
Mi-abot sa 229 ka mga Democrats ang mibotar pabor sa kaso samtang 195 ka mga Republicans usab ang supak.
Nag-atubang na usab karon si Trump og botasyon alang sa ikaduhang kaso – ang obstruction of Congress.
Samtang gihimo ang botohay, namulong usab si President Trump sa usa ka campaign rally sa Battle Creek, Michigan, uban kang Vice-President Mike Pence.
Gisugdan ang proceedings pinaagi sa panawagan sa Republicans nga suportahan ang procedural issues aron dili ipadayon ang proseso.
Gisundan kini sa botohay sa rules nga itakda alang sa impeachment, nga gisugdan sa unom ka oras nga partisan debate sa mga merito sa duha ka impeachment charges batuk kang President Trump.
