BUTUAN CITY – Nanawagan si Senador Alan Peter Cayetano sa gobyerno nga hangyoon ang International Criminal Court (ICC) nga temporaryong buhian si kanhi Pangulong Rodrigo Duterte ug ipailawom kini sa house arrest samtang nagpa-abot sa pagtaral sa kasong iyang gi-atubang.
Nakalatid sa gidusong resolusyon ni Cayetano, nga angayang tugotan ang temporaryong kagawasan sa 80-anyos na nga si Duterte base sa humanitarian grounds.
Kini tungod kay gikonsidera pa kining inosente hangtod nga mapamatud-ang guilty, base sa balaod sa Pilipinas ug sa internasyonal nga mga lagda.
Usa sa mga gisugyot sa resolusyon mao ang pakigkoordinar sa ICC aron ibalhin si Duterte sa Philippine Embassy sa The Hague, Netherlands, ug didto siya ipa-ilawom sa house arrest, modified house arrest, o bisan unsang kaayohan nga angay, base sa desisyon sa korte.
Kinahanglan usab nga sundon ang bisan unsang kondisyon nga i-demand sa Pre-Trial Chamber, sama sa mga limitasyon sa paglihok, pagpabilin sa usa ka partikular nga puy-anan, pagdili sa pakig-istorya sa mga biktima o saksi, ug pagtuman sa mga imbitasyon sa korte.
Nakalatid sa resolusyon ang nagkagrabeng kahimtang sa panglawas ni Duterte, nga tungod sa iyang katigulangon ug dugay nga pagpanginabuhi nga nag-inusara kansa posibleng duna’y grabeng epekto sa iyang pisikal ug emosyonal nga kahimtang kung magpabilin siya sa prisohan.
