BUTUAN CITY – Gimando sa Office of the Ombudsman ang pag-dismiss kang Bislig City Mayor Librado Navarro sa Surigao del Sur human siya nahukmang guilty sa grave misconduct subay na sa anumalusong pag-purchase sa usa ka hydraulic excavator nga nagkantidad og 14-milyunes, 750-mil pesos niadtong tuig 2012.
Una nang gitaral si Navarro uban sa laing 12 ka mga city officials tungod sa anumalusong pagpalit sa Komatsu crawler-type hydraulic excavator gikan sa RDAK Transport Equipment Inc. niadtong Hulyo 18, 2012.
Gawas kang Navarro, gimando usab sa Ombudsman ang pag-dismiss nila Bids and Awards Committee kon BAC chairman Charlito Lerog -ang City Administrator; BAC members nga sila City Treasurer Roberto Viduya, City Planning Development Coordinator Aprodecio Alba Jr., General Services Officer Felipe Sabaldan Jr., City Budget Officer-in-Charge Belma Lomantas, OIC-City Engineer Lorna Salgado, og City Legal Officer Daisy Ronquillo.
Una nang gi-dismiss sila Technical Working Group kon TWG members City Accountant Raquel Bautista, Gilbert Abugan, Laila Manlucob, og Estefa Mata.
Gawas sa dismissal, pahamtangan usab sila og accessory penalties sa pagkansela sa ilang eligibility, pag-forfeit sa ilang retirement benefits og hingpit nga pag-disqualify sa pagpanarbaho sa government service.
Nadiskubrehan sa Commission on Audit kon COA nga wala gipresenta sa RDAK ang espisipikasyon sa Komatsu unit sa ilang bid. (Beth Ruiz)
