BUTUAN CITY – Wala na gikakurat pa ni kanhi Presidential Legal Counsel Atty Salvador Panelo ang pagkutay sa Department of Justice kon DOJ sa kaso sa mga missing sabungeros ngadto sa duguong war-on-drugs sa Duterte administration.
Sigon ni Panelo, dugay na niyang namatikdan ang kagustuhan sa DOJ nga ikutay ang duha ka mga isyu base na usab sa mga naha-unang pamahayag ni Justice Sec. Jesus Crispin Remulla.
Dugang ni Panelo, sa sinugdanan pa lang, gusto na sa administrasyon nga dauton sila kanhi Pangulong Rodrigo Duterte ug anak niining si Vice President Sara Duterte rason nga dili na ikakurat ang pagkutay karon sa duha ka kaso.
Gidugang niini nga gipaningkamutan karon sa administrasyon nga ang tanang mga isyung mahimong ikutay ngadto sa kanhi pangulo ug kang VP Sara, himuon matud pa nila aron lang dauton ang maayong imahe sa ilang mga kaaway sa pulitika.
Ang iya lang gikatingad-an tungod kay nag-una kini kanunay sa pagyawyaw diha sa publiko inay nga mupakita una og mga ebidensya.
Wala na matud pa mutagam ang Department of Justice sa mga una nilang sayop sama sa ilang gihimo kang expelled Congressman Arnulfo Teves Jr ug kang kanhi Bureau of Corrections Director General Gerald Bantag.
Birada pa niini kang Remulla, wala pa gani gihimong preliminary investigation, nagpagawas na ang DOJ og pamahayag sama sa ilang pagsakay gilayon sa expose ni alyas Totoy dayong pasi-atab nga lig-on matud pa ang ilang gikuptang mga ebidensya.
