BUTUAN CITY – Gikalipay ni Police Senior Inspector Emerson Alipit sa Butuan City Police Office ang pagkasikop sa mga suspek nga mipusil-patay sa iyang classmate nga si Police Senior Inspector Michael Angelo Tubaña, hepe sa kapulisan sa lungsod sa Mallig. Isabela.
Na-ila ang usa sa mga suspek nga si Warren Bulawit, 19-anyos samtang gitago pa ang pangalan sa usa pa ka suspek tungod kay minor-de-edad pa.
Nadakpan sila kagahapon sa alas-dies sa buntag sa Tabuk City, sa lalawigan sa Kalinga.
Sigon ni Alipit, usa ka maayong tawo og matinud-anon sa serbisyo ang iyang classmate sa PNPA ‘Masaligan’ Class of 2011 hinungdan nga dakong kawad-on kini sa kapulisan.
Nasayrang nagsa-ulog pa og Father’s Day si Tubaña niadtong Dominggo kondiin nag-andam pa kini og pagkaon sa ilang police station.
Bag-uhay pa lang matud pa mi-abot gikan sa anti illegal drug operation si Tubaña og mibiya sakay sa iyang sakyanan dihang naagi-an niini ang duha ka mga lalaking misulay pagkawat sa usa ka motorisklo nga dali usab niyang gisita apan kalit na lang siyang gipusil.
Gidala pa siya sa Yumena’s Hospital sa Roxas City apan namatay ra usab samtang gitambalan. (Melody Valledor)
