BUTUAN CITY – Nahurot og sikop sa kapulisan sa Surigao City uban sa mga sakop sa ang tanang mga opisyal ug mga membro sa Federal Tribal Government of the Philippines kon FTGP human na-serve kaganinang alas-sais sa buntag ang arrest warrant nga gi-isyu sa huwis sa Municipal Trial Court in Cities kon MTCC alang sa kasong usurpation of authority ilawom sa Article 177 sa Revised Penal Code of the Philippines.
Sa eksklusibong pakighinabi sa Bombo Radyo Butuan, gipadayag ni Surigao City Police Station chief PLtCol. Mariano Lukban nga wala na’y tawo ang gi-ukupahang compound nila Datu Adlaw kon Jorgeto Santisas sa tinuod nga kinabuhi, Bae Lourdes Latraca Infante ug mga ka-ubanan, tungod kay anaa na kini sa ilang kostodiya.
Giklaro ni Col. Lukban nga ang maong kaso, duna’y pyansa nga ₱30,000.00 matag-ihap samtang ang laing tulo ka kaso nga naresolba na sa City Prosecutor’s Office nga duna’y probable cause, mugawasay na usab ang warrants of arrest.
Samtang ang mga seryusong kalapasan nga nakumitar sa grupo, anaa pa sa preliminary investigation sa City Prosecutor’s Office kansa wala’y pyansa. Apil na niini ang duha ka ihap sa kasong large scale illegal recruitment, serious illegal detention ingon man ang paglapas sa Qualified Trafficking in Person Act of 2003 ug ang multiple violation sa Cybercrime Law.
Wala matud pa nakapalag ang grupo human nakuratan sa ilang pag-abot rason nga igo na lang mi-uban kanila dihang gihurot og dakop.
