BUTUAN CITY – Nagsubmite na og incident report ngadto sa ilang sentrong buhatan ang Department of Tourism kon DOT-Caraga kalabot sa maglola nga Butuanon nga namatay atol sa ilang pag-island hopping sa Britania group of islands sa Brgy. Britania, lungsod sa San Agustin, Surigao del Sur.
Sigon ni Ryan Malbas-Tapayan, senior tourism operations officer sa Department of Tourism-Caraga, nasubo ang ilang ahensya pagpanguna ni regional director Ivonnie Dumadag sa maong insidente ilabina nga accredited sa ilang ahensya ang enterprise nga gidu-ulan sa maong mga turista.
Gi-acknowledge matud pa kini sa ilang central office pagpanguna ni Tourism Secretary Ma. Cristina Garcia-Frasco human nadawat ang police report usab kalabot sa maong insidente.
Tambag niini sa mga turista ilabina sa mga resort owners nga kung makitang daut ang panahon, mas maayong likayan una ang ingon niini nga kalihukan alang sa kaluwasan sa tanan.
Padayon karon ang ilang pagpangayo og detalyadong assessment gikansa lokal nga kagamhanan sa San Agustin susama sa aksyon nga ilang gihimo human sa insidente.
Alayon niini, iyang gi-awhag ang tanang gustong mulibot sa mga tourist destinations ning rehiyon nga lantawon ang ilang kaluwasan pinaagi sa pagduol sa mga tourism-accredited enterprises.
