BUTUAN CITY – Padayon pang gipanubayan ning sibyahan ang balitang patay na matud pa si Ka Maria Malaya kon Myrna Sularte sa tinuod nga kinabuhi, Secretary sa North Eastern Mindanao Regional Committee kon NEMRC sa New People’’s Army kon NPA human ang sunod-sunod nga engkwentro sa Andap Valley complex sa Surigao del Sur.
Ang maong engkwentrong natigayon sugod niadtong Mayo 14 hangtud 19, mikalas sa lain pang napulo ka mga rebelde apil na si Alvin Loque alyas “Joaquin Jacinto”, spokesperson sa Komisyun Mindanao ilabina nga na-atol ang engkwentro sa dakong panagtapok sa mga top ranking NPA leaders og combatants sa NEMRC alang sa planong pag-atake unta nila sa tropa sa kagamhanan.
Sa eksklusibong pakighinabi sa Bombo Radyo Butuan, gibutyag ni Capt. Al Anthony Pueblas, Civil Military Operations kon CMO officer 401st Brigade, Philippine Army, nga dako usab ang posibilidad nga anaa atol sa engkuwentro ang staff ni Alyas Malaya nga sila Alfie Masinatao Basa alyas “Momoy”, ang Vice CO sa Regional Headquarters , og Lorna Pamutongan Gomez alyas “Momay”, Medical Staff sa RHQ, NEMRC base na sa narekober nga mga laptop computers og overhead projector nga gitu-uhang gipanag-iyahan niini apil na kang Ka Maria Malaya.
Mahinumdumang sa maong operasyon, narekober sa tropa sa militar ang 5 ka mga high-powered firearms, 2 ka laptops, 1 overhead projector, flash drives, external hard drives, duha ka anti-personnel mines, hand grenades, bandoleers, assorted ammunition og magazines, handheld radios, personal belongings, assorted food and medical supplies, og subersibong dokumento nga dunay taas nga tactical value.
Nailog usab sa operating troops overrun ang kampo sa rebelde nga maka-akomodar sa dili moubos 120 ka indibidwal.
Sigon sa opisyal, nabaraw ang giplanong pag-atake sa North Eastern Mindanao Regional Committee kon NEMRC sa puwersa sa gobyerno. Base sa nakuhang impormasyon, boot nga bulabogon sa pikas grupo ang paningkamot sa gobyerno nga mabatukan ang COVID-19 pandemic.
