BUTUAN CITY – Gikahadlok sa usa ka admin staff sa college of public affairs sa Mindanao State University kon MSU-Main campus sa Marawi City, ang gidangatan ni Father Teresito “Chito” Suganob nga karun bihag matud pa sa Maute Group.
Sigon ni Fe Manulat, nga kasamtangang nag-proseso na sa iyang papeles aron maka-retiro ug nakapauli na sa ilaha sa Oroquieta City, hilabihan ang iyang kagool sa panghitabo apan wala matud pay lain kining mahimo kundi ang hugot nga pag-ampo.
Gihulagway pa niini si Father Suganob nga usa ka maayong tawo, diin dili katahaan sa iyang mga parokyano.
Wala matud pa mahadlok ang maong pari sa lugar nga gitawag ug islamic state bisan kaniadtong panahon pa sa iyang pagka-deakono diin na-assign kini sa MSU.
Gani siya ang kasagarang kuhaon isip speaker sa mga pulong sa mga Muslim leaders hinungdang naka-ila ang mga tag-as nga opisyal.
Gibutyag usab niini nga na-assigne si Fr. Suganob sa MSU apan mag-ulian kini sa kumbento sa Blessed Virgin Mary Church diin kini siya nadagit sa mga terorista. (Beth Ruiz)
