BUTUAN CITY – Gipasabot ni Philippine National Police kon PNP spokesperson Col. Jean Fajardo nga hugot nga kamanduan ni PNP Director General Rodolfo Azurin Jr. nga dili gamiton sa merry-making ang service firearms sa mga pulis atol sa holiday season.
Sa eksklusibong pakighinabi sa Bombo Radyo Philippines, gipadayag sa opisyal nga ang pagsalig ni General Azurin sa iyang ginsakupan ang hinungdan nga wala selyuhi karong tuiga buka sa ilang mga armas dungan sa pagtahas sa ilang mga team leaders ug police commanders nga pahimangnuan ang ilang mga tawo nga likayan ang indiscriminate firing.
Apan nahitabo kini kang rookie police Patrolman Loreto Padual Abrio nga na-assign sa 145th Special Action Company sa elite Special Action Force kon SAF niadtong Disyembre 31 human gisumbong sa iyang silingan dihang naaktuhan sa iyang pagpabuto.
Kini usab ang hinungdan sa pagka-relieve sa iyang commanding officer nga si PCapt. John Louise Pacres tungod sa command responsibility kansa gipasabot ni Col. Fajardo nga hugot ang kamanduan sa PNP chief nga ang kapakyas sa team leader pagpahimangno sa ilang mga sakop duna’y bugti nga pag-relieve sa katungdanan.
Samtang malinawon sa kinatibuk-an ang pagsa-ulog sa katawhang Filipino sa Pasko ingon man ang pagsugat sa tuig 2023 base sa ilang gihimong monitoring.
Gipadayag ni Col. Jean Fajardo nga karong tuiga usab natala ang pinakagamay lang nga ihap sa mga nabiktima sa pabuto sa tibuok nasud ug nakatala usab sila og pipila lang ka mga kaso sa indiscriminate firing ug pagka-igo sa sa-ag nga bala.
