BUTUAN CITY – Unod sa mga balita sa international community ang hingpit nang pagka-aresto ni kanhi Pangulong Rodrigo Duterte tungod sa kasong crimes against humanity ug pagtugyan niini ngadto sa International Criminal Court.
Daghang mga dagkong international news organizations ang nagmantala sa maong balita, sama sa mga Europe-based ug US-based media organizations kondiin ilang gibalik-lantaw ang mga nahitabo sa Pilipinas dihang si Duterte pa ang nagdumala sa nasud ug gipangunahan ang lapad nga drug war, apil na ang gika-ingong mga kaso sa extrajudicial killings nga resulta sa maong kampanya, ingon man ang wala pa maresolbang murder cases, ug uban pa.
Gawas niini, na-utingkay usab ang mga pamahayag kaniadto sa kanhi presidente sama sa pila ka higayong paghagit niini sa International Criminal Court.
Sa Netherlands, unod usab ang maong balita sa mga news organization apil na ang pagtapok-tapok sa mga Pilipino atubangan sa ICC compound, pila ka oras adiser mi-abot ang eroplanong gisakyan sa kanhi pangulo.
Gibalikan usab nila ang relasyon sa Pilipinas ug ubang mga nasud niadtong panahon ni kanhi Pangulong Duterte hangtud nga na-ila siyang ‘The Punisher’ sa international community.
