BUTUAN CITY – Ang atong paghandom sa katapusang panihapon mao ang importanteng kasa-ulugan karong adlawa Huwebes Santo isip pagsugod sa pascal triduum kansa mao ang tulo ka adlaw nga paghandom sa labing dakong misteryo sa atong pagtuo.
Sa eksklusibong pakighinabi sa Bombo Radyo Butuan, gipadayag ni Fr. Daryl Glenn Tatoy, tigpamaba sa Diocese of Butuan, ang maong misteryo mao ang pagpasakit, pagkamatay ug pagkabanhaw ni Ginoong Hesukristo kansa handumon hangtud sa gabii sa Dominggo sa pagkabanhaw kon Easter Sunday.
Gibutyag ni Fr. Tatoy nga tungod niini, ang mga simbahan sa nagkada-iyang mga parokya, magsa-ulog sa santos nga misa alang sa katapusang panihapon sa atong Santos nga Ginoo kondiin himuon ang paghugas sa tiil nga magsilbing paghandom sa paghugas ni Kristo sa tiil sa iyang mga disipulo.
Importante matud pa ang pagbalik-lantaw niini tungod kay gipakita ni Hesukristo ang iyang mapa-ubsanon ug mahigugmaong pag-alagad ug pagserbisyo ngadto sa iyang mga tinun-an.
Kini usa ka pag-awhag nga sundugon nato ang gihimo ni Hesus nga higugmaon ug serbisyuhan ang atong isig katawo.
