BUTUAN CITY – Gi-angkon ni Ka Amihan sa rebeldeng grupong New People’s Army kon NPA nga ang pagpuo matud pa sa kasagingan sa Dole Philippines, usa ka pagsilot sa Bagong Hukbong Bayan Front 19-B, Northeastern Mindanao Region kon NEMR ngadto sa maong kompanya.
Mahinumdumang gisugdan ang pagpuo sa napulo ka mga blocks sa kasagingan og ang pagdaub sa unom ka mga heavy equipments pasado alas-11:30 sa buntag hangtud na sa alas-3:10 sa hapon kagahapon didto sa Sitio Ibu, Brgy. Anahaw Daan, lungsod sa Tago, Surigao del Sur.
Sa pakighinabi ning sibyahan, gipadayag ni Ka Amihan nga tumong sa pagsilot aron mabati sa kadumalahan sa maong kompanya ang ilang pagpanikas sa mga mag-uuma kinsa wala na makatikad pa sa ilang umahan sukad kini gisudlan sa maong kompanya tungod kay gi-angkon na matud pa sa maong kompanya ang ilang yuta.
Gawas pa usab kini sa pagdaot matud pa sa Dole Philippines sa kina-iyahan tungod sa ilang gigamit nga kemikal.
