BUTUAN CITY – Atol sa pag-epekto na sa Executive Order No. 005 series of 2021 nga mag-ban sa mga orange tricycles pag-agi sa national highways sugod karong adlawa, Marso 1, maglusad usab og hunong pasada ang ubang tricycle transport groups ning syudad.
Sa pakighinabi sa Bombo Radyo Butuan, ibutyag ni NATCO President Nestor Eroa nga kasado na ang usa ka adlaw nilang hunong pasada karong adlawa nga magsugod sa alas-6 sa buntag hangtod sa alas-6 sa gabie.
Sumala ni Eroa kini ilang nasabutan isip pagpakita nga supak sila pagpatuman sa maong kamanduan.
Sumala ni Eroa, nadismaya ang mga drivers sa maong kamanduan kansa mas nagduot matod pa kanila sa kalisod gawas pa nga wala pa usab matod pa’y klarong rota nga gihatag kung asa muagi silang mga driver sa orange tricycles labi na ang magsumikad sa Eastbound sa pagpatuman unya niini.
Nakadugang matod pa ang maong kamaduan sa ilang kalisod tunga-tunga sa pandemya nga hatod sa COVID-19 nga kansa mas nagpa-nihit sa mga pasahero rasong nanawagan sila nga ibasura ang maong kamduan.
Una nang gipadayag ni Atty. Cisco Franz Maclang sa Butuan City Legal Office nga dili dapat maguol ang mga operator ug drivers sa mga dunay body color orange nga tricyle sanglit wala man sila gipugngan nga mamasahero sa ilang gitaganang rota.
Gipadayag usab ni ABC Butuan City Federation President Gemma Tabada, nga aduna na’y gimugna nga task force ang lokal nga kagamhanan alang sa paghimo og bag-ong route plan alang sa mga kolor orange nga traysikol nga ma-apektuhan unya sa pag-ban pag-agi sa national highway sugod karong adlawa, Lunes, Marso 1.
