BUTUAN CITY – Makabalaka ug katingad-an nga mga lihok ni Vice President Sara Duterte ang nagpaduso sa House Committee on Good Government and Public Accountability nga ipabalhin si OVP chief of staff Atty. Zuleika Lopez sa Correctional Institution for Women sa Mandaluyong City.
Sigon ni Manila 3rd District Rep. Joel Chua, chairman sa komite, ang maong desisyon nga ibalhin sa gibilangoan ni Lopez, nasabotan matod pa sa usa ka emergency Zoom meeting niadtong byernes human nakadawat ang komite ug duha ka sulat nga maoy hinungdan sa pagkabalaka sa mga myembro niini.
Ang unang sulat gikan sa igsoon ni Bise Presidente, nga si Davao City Rep. Paolo “Pulong” Duterte, nga nag-abiso sa komite nga iyang gitugutan si VP Duterte na magpabilin “indefinitely” sa iyang opisina sa House of Representatives.
Samtang ang ikaduhang sulat, gikan usab mismo kang VP Duterte, nga nangayo ug pagtugot nga mag-jogging sulod sa nataran sa Kamara.
Unang gihatag sa komite ang mga sulat ngadto kang House Sergeant-at-Arms retired Police Maj. Gen. Napoleon Taas, tungod kay dili kini sakop sa komite apan ang pagkalat sa mga sulat sa social media maoy hinungdan sa dugang pagka-alarma sa mga mambabalaud ug hinungdan usab sa maong gipatigayon nga emergency session sa Zoom meeting.
Gipahayag usab sa mga miyembro ang ilang kakulba mahitungod sa presensya ni Bise Presidente sa sulod sa House complex ug ang mamahimong epekto niini sa mga operasyon sa seguridad.
Sigon sa komite nga ang mga pagbisita sa ikaduhang pangulo kauban ang mga armadong security detail maoy hinungdan sa kagubot sa normal nga operasyon sa kamara de Rpresentantes ug tungod sa kritikal nga sitwasyon napugos ang komite nga molihok sa wala pa ang gitakda nga pagdungog sa lunes.
Gihatagan usab og gibug-aton ni Chua nga ang emergency session gihimo subay sa mga lagda sa Balay ug gisiguro nga adunay korum.
