BUTUAN CITY – Ipadayon karong adlawa sa Agusan del Norte Provincial Health Office ang vaccination roll out alang sa 378 ka mga doses sa Sinovac COVID-19 vaccines nga gi-alokar alang kanila human nga malampusong natupukan kagahapon ang 98 ka mga healthcare frontliners.
Sa eksklusibong pakighinabi sa Bombo Radyo Butuan, gipadayag ni provincial health officer Dr. Odelio Ferrer, nga sa ilang natupukan, usa lang ang nakasinati og adverse reaction human nalipong apan naka-uli na.
Usa usab matud pa siya sa nakasinati og gamay nga reaksyon human ang pagtupok kaniya sa bakuna apan okey ra ang iyang paminaw gawas lang sa paminhod sa bukton diin siya natupukan.
Sigon ni Dr. Ferrer, posibleng matapos nila ang pagtupok sa mga mu-qualify gikan sa ilang 378 ka mga frontliners sulod sa tulo ngadto sa upat ka mga adlaw.
Gidugang pa niini nga 90-porsiento sa ilang ka-ubanan ang nagpadayag og interest nga magpatupok sa Sinovac vaccine apan dili mu-qualify ang uban rason nga maghulat pa sa laing brand sa bakuna.
Nanawagan usab kini sa publiko nga wala’y angayang kabalak-an ang Sinovac vaccine tungod kay tested na kini sa ubang kanasuran gawas nga maghatag pa kini og proteksyon.
