BUTUAN CITY – Dili na ipagamit sa Municipal Engineer’s Office kon MEO sa lungsod sa Hinatuan, Surigao del Sur ang PAGASA Doppler Radar Station tungod sa liki sa mga bungbong niini nga mugna sa kusog nga pagtay-og ning mi-aging adlaw.
Kini bisan og sa lungsod lang sa San Agustin sa susamang lalawigan ang epicenter sa magnitude 6 nga linog.
Sa ekslusibong pakighinabi sa Bombo Radyo Butuan, gibutyag ni chief meteorological officer Allan Rebo nga human sa linog, wala na sila mutrabaho pa sulod sa walo ka andana nilang dakbalay tungod sa kataas sa liki.
Sa gihimong assessment sa MEO, delikado nang ukupahan ang maong istasyon tungod kay siguradong mubigay matud pa kini higayong duna’y mutay-og nga kusog nga aftershock.
Sa pagkakaron, mudalikyat gihapon sila og sulod apan puno na sa pag-amping kondiin abli ang tanang bintana ug pultahan niini ug seguraduhong anaa lang sila duol sa hawan nga magsigurong makadagan gilayon sila higayong duna’y mabating kusog-kusog nga aftershocks.
Gani wala pa nila ma-estimate ang damyos gikan sa ikaduha hangtud sa ikapitong ang-ang sa ilang dakbalay tungod sa kahadlok nga hayan mubigay kini.
