BUTUAN CITY – Malipayong gipahibalo sa lokal nga kagamhanan ning siyudad sa Butuan nga mahimo nang maka-apply sa route conversion ang mga operators sa mga orange tricycles aron makabiyahe sa mga lugar nga maoy destinasyon sa mga ruta alang sa red, yellow, puti ug green nga motorela.
Kini human gi-aprubahan ni Butuan City Mayor Ronnie Vicente Lagnada ang SP Ordinance No. 6318-2021 nga magtugot sa mga orange triycles pag-convert sa nagkalain-laing ruta sa syudad.
Sa eksklusibong pakighinabi sa Bombo Rady Butuan, gipadayag ni City Administrator Rey Desiata nga muduol lang ang mga drivers o kaha operators sa mga orange tricycles sa Business Permit & Licensing Division kon BPLD aron maka-apply na sa rutang gusto nilang biyahian.
Wala matud pa’y angayang kabalak-an ang mga operators tungod kay libre ang pagpintal og rebete sa ilang yunit rason nga wala na sila’y kwartang magasto ug ang gikinahanglan lamang mao ang pagsubmite sa ilang application form ug original copy sa 2021 Motorized Tricycle Operator’s permit.
Hulaton lamang ang tawag gikan sa BPLD aron sa pagkuha sa Certificate of Compliance ug Provisional Authority ug mao dayon kini ang dalhon sa Motorpool aron ma-pintalan og stripe ang atubangan ug kilid nga bahin sa tricycle subay sa color.
Lakang kini sa lokal nga kanggamhanan sa Butuan isip tubag sa kakulangon sa ihap sa yunit sa ubang rutas sa ingon dili na maglisod pagpangita og kasakyan ang mga pasahero.
