BUTUAN CITY – Sakto sa panahon ang pag- anunsyo kaganinang pasado alas-dose sa tungang gabii, oras sa Pilipinas ni Canadian Prime Minister Justin Trudeau nga mukanaog na sa maong posisyon ingon man isip lider sa ilang LIberal Party.
Sigon ni Bombo international correspondent to Canada Eric Sena, dugay nang gusto sa mga Canadians apil na sa mga Filipino-Canadians nga mukanaog na sa posisyon ang primero ministro. Kini tungod kay dugay nang nawad-an og pagsalig ang kadaghanan sa mga Canadians ngadto sa maong lider mugna sa wala’y ayo matud pa nga pagdumala niini sa gobyerno.
Dili matud pa malimod nga duna’y daghang maayong butang nga nahimo si Trudeau sa ilang nasud ilabina ang pagbukas sa ilang nasud alang sa mga immigrants. Mitumaw na ang problema dihang overloaded na ang mga migrante nga naka-apekto na sa mga proyektong pabalay ingon man sa pagpanarbaho sa mga mismong Canadians ug mga foreign Canadians.
Sigon ni Sena, unahon una sa partido ang pagpangita nila og bag-ong lider hangtud sa Marso 24 kondiin sa pagkakaron, ang nasangpit nga partido pa ang nangulo sa parliamento. Posible matud pa nga sa pagbalik sa ilang caucus sa Marso 24, hayan mag-atubang og no confidence vote ang nasangpit nga partido ug aron makapatawag na og eleksyon sa springtime.
