BUTUAN CITY – Gikondena sa Bayan Muna ang pagpasundayag sa militar sa patay’ng lawas sa anak sa iyang ka-ubanang si Rep. Eufemia Cullamat nga si Jevilyn Cullamat kinsa napatay sa engkwentro sa Brgy. San Isidro, lungsod sa Marihatag, lalawigan sa Surigao del Sur.
Sa eksklusibong pakighinabi sa Bombo Radyo Butuan, gipadayag ni Bayan Muna partylist Rep Carlo Isagani Zarate, daw gihimong trophy sa militar ang pagpakita sa mga armas ug uban sa naghigdang patay’ng lawas ni alyas Ka Reb, 22-anyos nga nagkatag karon sa social media.
Sa pagkamatay sa anak ni Cullamat, wala matud pa’y napamatud-an sa ilang akusasyon ang militar nga ang Bayan Muna, partido gyod sa komunista ug dili matud pa kini himuong basehan tugod kay ang nagtukmod sa mga lumad nga magpabukid mao ang kalisod sa pagkab-ot sa hustisya kansa magpadayon hangtud nga wala’y mapakitang kapatas sa balaud ang gobyerno.
Kini matud pa ang hinungdan nga bisan og pareho og baruganan ang biktma ug ang inahan niining kongresista apan girespeto sa inahan ang desisyon sa iyang anak nga nagsubay sa walhong kalihukan.
Kini ilabina nga nasaksihan matud pa sa napatay nga Cullamat ug uban nilang mga katribu, ang kabangis ug pagpangabusong gihimo sa militar ngadto sa ilang komunidad kansa gi-ilang highly militarized area.
Partikular nga nasaksihan sa mga residente sa Sitio Han-ayan, Brgy. Diatago, lungsod sa Lianga, Surigao del Sur ang pagpatay matud pa sa tropa sa kagamhanan sa usa ka school directpr ug duha ka mga ka mga tribal leaders niadtong Septembre 1, 2015.
Naila ang mga gipatay nga sila Emerito Samarca, 54-anyos, executive director sa Alternative Learning Center for Agriculture and Livelihood Development kon ALCADEV (Alcadev) ug laing mga lumad leaders nga sila Dionel Campus ug Aurelio Sinzo.
Usa lamang matud pa kini sa mga bug-at nga hinungdan nga nagtukmod sa mga lumad apil na sa anak ni Cullamat nga pili-on ang walhong pakigbisog samtang ang uban mas gipili ang malinawong pagpasibaw sa ilang mga yangungo ug demanda.
