BUTUAN CITY – Mag-agad matud pa kang Pangulong Rodrigo Duterte kung iyang dawaton ang resolusyong gi-aprubahan sa mga membro sa United Nations Human Rights Council kon UNHRC nga nangayo og pagpasabot gikan sa kagamhanan sa Pilipinas.
Kini may kalabutan na sa ilang gika-ingong extra judicial killings kon EJK nga natigayon sa pagpatuman sa administrasyong Duterte sa war-on-drugs nga angayan matud pang imbestigahan.
Sa ekslusibong pakighinabi sa Bombo Radyo Butuan, gibutyag ni Atty. Glenn Carampatana kinsa konsehal usab ning siyudad sa Butuan, nga dili otomatikong makahimo og imbestigasyon ang UNHRC sa ilang gihingusgang extra judicial killings kung dili mu-uyon niini ang gobyerno.
Apan alang kang Konsehal Carampatana, mas maayong tugutan sa kagamhanan ang imbestigasyong gitinguha sa United Nations.
Kini aron mawala ang ilang pagduda ilabina kung sa lantaw sa nasudnong kagamhanan wala sila’y gitago sa ilang illegal drugs campaign.
Pinaagi matud pa sa pagtugot sa UNHRC, malimpyuhan ang imahe sa Pilipinas ngadto sa tibuok kalibutan nga wala’ya tawhanong katungod nga nalapas ang gobyerno sa mga katu-igang gipatuman ang nasangpit nga kampanya.
Una nang gibutyag sa Malakanyang nga ila pang repasuhon ang maong resolusyon aron matun-an og maayo.
