BUTUAN CITY- Planong pag-export og saging gikan sa Pilipinas paingon sa Australia dugay na matud pang gipangandoy sa mga katawhang Pilipino nga anaa sa maong nasud, sumala ni Denmark Suede, Bombo International Correspondent sa Australia.
Sigon pa ni Suede nga tungod sa hugot nga quarantine requirements sa nasangpit nga nasud, lisud nga makasulod ang produkto sa Pilipinas, tungod kay giprotektahan lang usab matud pa sa Australia ang ilang agrikultura pinaagi sa pagdili sa pagpasulod sa prutas nga posibleng makadala og peste, sama sa fruit fly nga sagad makita sa Pilipinas.
Gipasabot usab niini, nga bisan ang mga turista nga nagdala og prutas ug wala kini ideklara, mahimong ma-deport gilayon. Apan ang maong lakang giila ni Suede nga maayong balita tungod kay mas tam-is pa ang saging sa Pilipinas kumpara sa lokal nga saging sa Australia, ug gilauman nga masundan kini sa pag-apruba sa Philippine Mango nga mas labaw sa tam-is kon ikumpara sa Australian mango.
Dugang pa ni Suede, nga ang plano sa pag-export sa Philippine Banana paingon sa Australia adunay sagul nga seguridad, politika ug ekonomiya, tungod makita sa Australia nga makatabang kini sa Pilipinas aron madiversify ang export. Gibutyag usab niini, nga sa New Zealand mas sayon ang pagpasulod sa prutas gikan sa Pilipinas diin wala silay kaugalingong saging ug mangga, apan lahi ang sitwasyon sa Australia nga adunay kaugalingong agrikultura nga giprotektahan.
Gipunting usab ni Suede, nga tungod kay signatory ang Australia sa kasabutan, adunay katungod ang Pilipinas nga mangayo og access, apan adunay katungod usab ang Australia nga magpahugot sa quarantine requirements, gani kinahanglan nga masunod sa Philippine side ang mga pamalaod aron maaprubahan ang export.
