BUTUAN CITY – Ang pag-demonize matud pa sa main stream media sa Estados Unidos kang Republican presidential candidate Donald Trump ang rason nga nakadaug kini. Kini ang panglantaw ni political analyst Atty. James Reserva sa dagan sa eleksyon nga wala matud pa’y kala-inan sa nagakahitabo karon sa Pilipinas.
Sigon sa abogado, gigamit sa Biden administration ang ilang mga makinaryas apil na ang mainstream media nga gipanag-iyahan sa mga oligarchs aron lang dauton si Trump ug muhumot sa katawhan ang ka-atbang niining si Vice President Kamala Harris.
Ang paggamit matud pa sa administrasyong Biden og political strategy aron makamugna og political opinion pabor kang Kamala, wala musalir sa katawhan.
Dugang pa ni Atty. Reserva, kung ang eleksyon susama pa kaniadto nga wala’y social media, siguradong mapildi si Trump tungod kay ang mga tawo, mutuo man kung unsa ang imakmak sa mainstream media.
Apan tungod sa social media, duna na’y mu-counter sa mainstream media tungod kay dili na man lang sila ang mahimong tuburan sa impormasyon sa katawhan nga nangita og kaayuhan nga alang kanila apil na sa lider nga sa ilang tan-aw, makatabang aron mumaayo ang ilang panginabuhian.
