BUTUAN CITY – Estraihiya lamang sa Pamilyang Duterte ang gihimong pag-anunsyo ni Vice President Sara Duterte, nga sabay matud pa nga mukandidato isip Senador ang 2 niini ka mga igsoon ingon man amahan nga kanhi Presidente Rodrigo Duterte alang sa 2025 midterm election.
Kini ang gikabutyag sa Political Analyst nga si Ramon Beleno III, diin gisukod lamang matud pa sa pamilya kung duna pa ba silay ‘public glamour’. Kahinumduman nga bag-ohay lamang gibutyag sa bise presidente nga ginakonsidera karon nila Former President Rodrigo Duterte, Davao City 1st District Representative Paolo ‘Pulong’ Duterte, ug Davao City Mayor Sebastian ‘Baste’ Duterte ang pagdagan isip Senador sa nasud sunod tuig. Sumala pa ni Beleno nga dili katuohan nga dungan nga modagan ang tulo ka mga Duterte tungod sa pipila ka rason. Una mao ang nga ‘counter productive’ ang nahisgutang lakang.
Dakong pangutana usab alang kay Beleno kung nganong sa kadaghan og mamahimong daganan, sa pagka senador lamang modagan ang tulo. Kini gumikan sa Senate o senado, adunay ginatawag nga ‘collective decision’ o naga-desisyon kini sila isip ‘one body’ busa kung madaog man ang tulo, maglisod gihapon sila sa pagdesisyon sanglit gikinahanglan niini ang pag-uyon sa uban pang senador.
Dugang pa sa political analyst, alang sa mga nakaila gayud sa Duterte, mabasa nga estratehiya lamang kini sa mga politicians aron makahatag og kalibog sa ilahang mga kaatbang. Subay niini nga karong panahona matod pa ang season sa alignment ug realignment sa politika.
