BUTUAN CITY – Gipangunqahan ni Mayor Ronnie Vicente Lagnada ang pagsa-ulogsa dakbayan sa Butuan sa ika-119 nga anibersaryo sa adlaw sa kaugalingnan kon Indepedence Day.
Usa ka programa ang gihimo sa may Guingona Park nga gitambungan sa mga empleyado sa City Hall og uban pang lokal nga buhatan sa mga ahensya sa gobyerno.
Sa iyang pagpamulong atubangan sa misaksing katawhan, gidayag sa mayor nga hagit sa kasa-ulugan sa kaugalingnan sa Pilipinas ning tuiga, ang kagubot nga mugna sa Maute group didto sa Marawi City.
Aminado ang opisyal nga kini nga mga hagit, dakong babag alang sa mga Mindanaoans nga mahigugmaon sa kalinaw.
Apan pagdasig sa mayor, dili angayang magpadala sa nasangpit nga mga hulga ilabina kung hisgutan na ang tinguhang mapalambo pa ang dakbayan sa Butuan.
Kinahanglan usab matud pa nga atubangon ang tinuod nga risgo sa kinabuhi sa ingon makalingkawas na gikan sa gi-atubang nga mga kalisdanan.
Alayon niini, gihagit ni Mayor Lagnada ang tanan nga huna-hunaon sa matag-usa kung tinud-anay bang duna na kita’y kagawasan sa atong kaugalingon gikan sa mga bisyo, mga kina-iya og angayan usab matud pang huna-hunaon kung ato bang nahimo ang mga serbisyong angayang ihatag ngadto sa publiko ilabina kung ikaw usa ka suluguon sa publiko. (Beth Ruiz)
