BUTUAN CITY – Mas misamot pa ang pagpamomba nga nasinatian karun sa United Arab Emirates sigon sa pagbutyag ni Bombo International News Correspondent Nichole Bedtao sa eksklusibong pakighinabi ning sibyahan.
Sigon niini nga kagahapon lang 37 ka drons og 7 ka ballistic missiles ang gitira sa Iran ngadto sa US Airbase sa UAE diin dool lang sa ilang nahimutangan rason nga dili ti-aw ang ilang kahadlok.
Sumala pa ni Bedtao nga mangsinggit og nanghilak ang iyang mga kaubang Pinay sulod sa balay diin siya lang usab ang mag-alam-alam aron kini mokalma.
Mabati gayud matud pa ang mga pagtay-og og mga pagbusikad bisan og hinanok ka sa tulog tungod sa kakapoy sa trabaho.
Samtang dunay mga higayon usab nga sa ilang rooftop matagak ang mga debris gikan sa drones og ballistic missiles nga nababagan sa air defence system sa maong nasud.
Pag-obserba pa niini nga nagkadugay, nagka-lala ang sitwasyon sa ilang lugar rasong nagtoo bisan ang ilang amo nga dugay pa matapos ang giyera.
Apan bisan paman niini, gipa-ambit ni Bedtao nga manggawas gihapon ang mga tawo diin abli gihapon ang mga opisina sa gobyerno gawas nalang sa klase nga suspindedo.
Samtang walay plano usab gihapon silang mooli tungod kay gawas nga walay biyahe, wala pa usab natapos ang kontrata nga kung mamugos kag uli, mobayad ka og 200-mil pesos.
Kini gawas pa nga walay trabahong naghulat sa Pilipinas.
