BUTUAN CITY – Gikalipay ni National Anti-Poverty Commission kon NAPC lead convenor ug Secretary Lope Santos III human nasuta nga padayong gipatuman sa mga hingtungdang national-line government agencies ug sa mga local government units dinhi sa Caraga Region ang mga programa sa nasudnong kagamhanan alang sa mga kabus.
Sa eksklusibong pakighinabi sa Bombo Radyo Butuan, gibutyag sa opisyal nga kini base na usab sa ilang gihimong consolidation meeting sa mga hepe sa maong mga regional offices apil na sa mga local chief executives ug basic sector sa katilingban.
Partikular nga gikalipay niini ang mga programang nakatutok sa Magna Carta of the Poor aron masigurong mahatagan og igong pagkaon ang mga kabus nga pamilya.
Apil sa mga ahensyang ka-abag nila sa pagpatuman sa mga programa ang Department of Agriculture, Department of Labor and Employment kon DOLE, Department of Environment and Natural Resources kon DENR, Department of Trade and Industry kon DTI, Department of Education kon DepEd, Commission on Higher Education kon CHED ug uban pa.
Ang mas tutukan karon sa iyang komisyon mao ang pagmugna pa og dugang trabaho ingon man pabalay subay na sa tinguha ni Pangulong Ferdinand ‘Bongbong’ Marcos Jr. nga makamugna og 6-milyunes nga pabalay hangtud sa pagtapos sa iyang termino.
