BUTUAN CITY – Nasuta na sa Committee on Dangerous Drugs sa House of Representatives ang ubay-ubay nga mga problema sa buhatan sa Bureau of Customs (BOC) nga maoy rason nga kanunay kining malutsan sa mga sindikato o smuggler.
Sa pakighinabi ning sibyahan, gibutyag ni Surigao del Norte 2nd District Representative Robert “Ace” Barbers, chairman sa nasangpit nga komitiba, nga nakahimo na matud pa sila ug duha ka pagdungog may kalabutan sa pagkalusot sa 604 kilos nga shabu sa BOC ug dinhi ilang nasayran nga daghan gyud ug problema sa sistema sa maong buhatan rason nga mapahimuslan kini sa mga sindikato.
Sigon niini, nga padayon gihapon nga nagtunhay ang pagpanghatag ug payola ngadto sa mga kurakot nga empleyado sa maong opisina aron lamang nga wala na’y mahitabo nga pag-inspeksyon sa mga ipalusot nga mga kargamento sa naghatag sa maong payola.
Matud pa nga kini ang nag-unang hinungdan kung ngano nakalusot ang maong kinilong shabu ug nagtuo kini nga dugay na kining nahimong kalakaran sulod sa maong ahensya.
Subay niini, posible matud pa nga magpahigayon pa sila ug lain pang hugna sa pagdungog tungod kay buot pa gyud nila nga makita ang uban pang lapses sa sistema sa maong buhatan sa pagsala sa mga ipasulod nga kargamento dinhi sa nasud.
Paningkamotan matud pa nila nga makuha ang tanang mga impormasyon ug ma-analisar kini aron nga makamugna ug usa ka kompleto nga committee report. (Beth Ruiz)
