BUTUAN CITY – Gihagit ni Pangulong Rodrigo Duterte si Senador Manny Pacquiao nga pamatud-an ang alegasyong mas migrabe ug tulo ka pilo karon ang kurapsyon sa mga buhatan sa gobyerno.
Bahad ni Digong, mangampanya siya batuk sa boxing senator kung wala kini mahatag kaniyang mga pangalan sa mga empleyado ug opisyal sa mga government agencies nga gika-ingong mga kurakot.
Gi-alegahan pa niini ang senador nga namulitika na tungod kay kung duna pa kini nasayran, dapat kaniadto na kini mihatag kaniya sa maong impormasyon aron iya gilayong ma-aksyunan.
Gipadungog-dungog pa niya kini nga nagdamgo lang kung gusto niining mudagan pagka-besi presidente sa umalabot nga eleksyon ilabina nga bukas siyang mudagan sa maong posisyon, depende sa mamahimo niyang suportahan nga presidential candidate.
