BUTUAN CITY – Mismong sila Defense Secretary Delfin Lorenzana ug Armed Forces of the Philippines Chief of Staff General Andres Centino, ang mitunol sa reward money ngadto kang alias ‘Ricky’, ang informant nga maoy nahimong dalan aron ma-neutralize sa Jorge ‘Ka Oris’ Madlos sa Headquarters sa 4th Infantry (Diamond) Division.
Si alyas Ricky ang mihatag og impormasyon nga misangpot sa pagkamatay ni Ka Oris atol sa engkwentro tali sa kasundaluhang sakop sa 403rd Infantry Brigade niadtong Oktubre 30, 2021 didto sa Dumalaguing, Impasugong, Bukidnon.
Madumdumang sukad niadtong tuig 2000, mi-abot sa 7.8-milyunes pesos ang gipatong nga reward money sa ulo ni Ka Oris pinaagi sa AFP-PNP Joint Order of Reward sa DND alang ni bisan kinsang makahatag og impormasyon nga musangpot sa pag-arest kang Ka Oris, kinsa usa sa mga most wanted fugitive top leaders sa New People’s Army (NPA).
Atol sa awarding, si alias “Ricky”, kinsang nawong gitabunan alang sa iyang seguridad, personal nga gitimbaya ni Secretary Lorenzana tungod sa iyang ka-isog ug pagsalig sa gobyerno taliwa sa posibleng mga risgo ug hulga sa iyang kinabuhi.
Mala-umon matud pa ang DND Chief nga gawas sa monetary reward, sundugon usab sa ubang mga indibdiwal ang gihimo ni “Ricky” isip responsibilidad ug commitment tnga mapaspsan ang tinguha sa gobyeerno nga tapuson na ang local communist armed conflict.
