BUTUAN CITY – Gibulgar ni Senate Blue Ribbon Committee chairperson Panfilo “Ping” Lacson gna gi-imbestigahan niya ang matud pa paggamit sa mga flood control ug uban pang infrastructure projects sa Department of Public Works and Highways isip bugti sa kumpirmasyon ni kanhe Sec. Manuel Bonoan isip kalihim sa ahensya sa Commission on Appointments niadtong 2022.
Sigon ni Lacson, bisan og posibleng hapit na matapos ang imbestigasyon sa komite sa matud pa kahiwian sa flood control projects, nagpadayon pa gihapon ang iyang kaugalingong pagsusi sa mga gidudahang ghost o substandard nga mga proyekto.
Dugang pa sa senador, usa sa mga pinaka-intersadong impormasyon nga mitumaw sa ilang imbestigasyon ang matud pa paggamit sa mga proyekto sa insentibo sa panahon sa pagdungog sa Commission on Appointments para sa kumpirmasyon ni Bonoan.
Sigon ni Lacson nga gikan kanhe DPWH Usec. Roberto Bernardo ang impormarsyon diin misaad matud pa si Bonoan sa kapin 500 milyones pesos nga kantidad sa mga proyekto sa DPWH sa usa ka miyembro sa CA gikan sa kamara.
Matud pa niini, gisulti sa nasangpit nga miyembro nga ipanghatag niya ang proyekto sa iyang mga kaubanan apan sa ngadto-ngadto nagreklamo ang uban sa mga niini tungod kay wala may nadawat nga proyekto.
Samtang migawas usab sa imbestigasyon nga sa maong panahon, ang CA committee on public works and highways nga nagkumpirma sa ad interim appointment ni Bonoan ug gidumala sa kaniadto representante sa SAGIP Party-list ug karun senador nga si Senator Rodante Marcoleta nga iladong usa sa mga kritiko ni Lacson sa pamaagi sa paghawid sa Blue Ribbon Committee sa imbestigasyon sa matud pa mga anomalya sa Flood control Projects.
Samtang gibutyag usab ni Lacson nga padayon pa ang beripikasyon sa nasangpit nga impormasyon lakip na ang pagsusi sa mga record nga gihatag ni Bernardo aron matumbok kung dunay kamatooran ang listahan sa mga proyekto nga matud pa gigamit isip bugti sa kumpirmasyon ni Bonoan.
