BUTUAN CITY – Gianunsyo sa Department of Health (DOH) kagahapong adlawa nga apribado na sa Philippine Health Insurance Corporation (PhilHealth) Board of Directors ang P284-billion nga budget alang sa tuig 2025, dugang niini, gipatas-an usab sa maong ahensya ang binipisyo nga makuha sa ilahang mga membro, lakip niini ang case rates kansa gipasakaan ngadto na sa 50%.
Sumala pa ni DOH Secretary Teodoro J. Herbosa nga walay angay ikabalaka tungod kay daghan matud pa og kwarta ang Philhealh, gani, mas labaw pa ang ilahang pondo kon itandi sa gikinahanglan sa balaod.
Una nang gipermahan ni Herbosa uban sa lain pang PhilHealth Board of Directors ning nakalabayng adlaw ang sa P284-billion Corporate Operating Budget (COB) alang sa Fiscal Year 2025. Dugang pa sa maong opisyal nga tumong sa maong budget ang paggasto og dako sa panggamhanan arun gamay ra ang magasto sa mga pamilyang Pilipino sa hisgutanang panglawas.
