BUTUAN CITY – Mu-epekto na sa tibuok Caraga Region karong Disyembre 8 ang wage order no. 15. kansa nagtakda og bag-ong rata sa suhulan sa mga trabahante sa pribadong sektor human mi-expire ang wage order no. 14 niadtong Hulyo ning tuiga.
Sa eksklusibong pakighinabi sa Bombo Radyo, gibutyag ni Earl de la Victoria – board secretary 6 sa Regional Tripartite Wages and Productivity Board kon RTWPB-Caraga nga nadesisyunan sa board og gi-aprubahan ni regional director Chona Mantilla nga ipatuman sa tulo ka tranche ang usbaw sa suhulan sa mga empleyado.
Sugod karong Disyembre 8, dugangan og 10-pesos ang Cost of Living Allowance kon COLA hinungdan nga gikan sa 280-pesos, mamahimo na kining 290-pesos.
Samtang sa Pebrero 14 sunod tuig, dugangan na usab kini og laing 10-pesos nga ibutang sa daily wage og dugangan na usab og 5-pesos sa karong Mayo uno sa basic pay.
Ang 25-pesos nga usbaw sa suhulan bunga sa win-win solution nga nakab-ot sa RTWPB human ang gihimong mga konsultasyon sa nagkada-iyang sektor. (Beth Ruiz)
