BUTUAN CITY – Kapin sa 23 milyones pesos nga salaping cash nga gisulod pa sa mga boxes ang narekober sa mga sakop sa Criminal Investigation and Detection Group-Caraga sa operasyong ilang gilusad batuk sa usa ka investment scam nga Forex Trading pasado alas 7 kagabii sa usa ka beach resort sa District 2, Brgy. Cubi-Cubi, lungsod sa Nasipit, Agusan del Norte.
Sa eksklusibong pakighinabi kang P/Lt. Col. Cholijun Caduyac, regional chief sa CIDG-Caraga, gibutyag niining nagsugod ang ilang monitoring sa tanang mga investment schemes ning rehiyon dihang gimando ni Pangulong Rodrigo Duterte ang pagpasira sa mga niini.
Gani, ang una nilang nakuhang impormasyon inanay nang misibat ang mga opisyal niini rason nga wala’y natigayong payout sa mga adlaw nga gi-eskeyol ang pagpahigayon niini.
Hangtud nga kagahapon, nakakuha sila og impormasyon nga duna’y himuong payout sa Forex Trading didto sa Talacogon, Agusan del Sur apan tungod kay nakamatikod ang mga nagdumala niini, rason nga mibalhin sila sa maong lugar apan nakasibat ang mga nanguna niini uban sa ubang mga membro nga naglumba usab pagpanagan.
Lakip sa ilang mga narekober ang lima ka mga silyadong storage boxers, mga ledgers og mga log books diin nakasulat ang pangalan sa mga investors nga gikan sa nagkada-iyang barangay ning dakbayan apil na ang ilang mga acknowledgement receipts.
Samtang karong adlawa gikatakdang ipasaka sa korte ang kasong large scale estafa batok sa founder ug mga opisyales sa Forex Trading pinaagi sa ilang mga investors nga midangop sa ilang buhatan.
Duna usab sila’y nadawat nga mga tawag gikan sa mga investors niini sa Davao City og Tagum City kinsa mudalikyat ning siyudad karong adlawa aron muhatag usab sa ilang affidavit sa ingon malakip kini sa mga reklamante sa ilang ipasakang kasong large scale estafa.
