BUTUAN CITY – Gibana-banang 20-milyunes pesos ang damyos nga namugna human gilamoy sa kalayo ang bunkhouse sa mga empleyado sa United Wood Industry Corporation sa may Brgy. Baan Kilometer 3 ning siyudad pasado alas-5:30 sa hapon.
Sigon ni SFO4 Rodrigo Canton sa Bureau of Fire Protection kon BFP-Butuan, naggikan matud pa ang kalayo sa electrical short circuit hinungdan nga gawas sa na-ugdaw nga bunkhouse.
Na-apil usab paglamoy sa kalayo ang mga treated plywood nga andam na untang i-deliver ugmang adlawa.
Gidugang sa opisyal nga ang maong kompanya mipasar sa ilang fire safety inspection hinungdan nga nahatagan kini og certificate aron maka-operate.
Duna usab kini kaugalingong company fire brigade gawas nga kompleto usab sila sa fire skills og duna pa’y fire truck.
Base sa inisyal nilang imbestigasyon, nagsugod pag-ulbo ang kalayo dihang inanay nang nanguli ang morning shift atol sa pag-abot sa ilang mga karelyibo.
Padayon pa gihapon ang ilang imbestigasyon aron masuta kung gituyo ba kini o wala. (Beth Ruiz)
