P20K nga gi-alkansiyang kwartang pang-tuition, apil sa nalatayan sa kalayo sa sunog sa Butuan City

BUTUAN CITY – Wala malikayi ang paghilak sa tricycle driver nga si Rosendo Racaza human nga apil  sa nalatayan sa kalayo ang iyang tinigom sa puthaw nga mga kwartang papel nga alang unta sa pag-eskwela sa iyang anak nga gibana-banang mi-abot sa 20-mil pisos.

Nakita matud pa niya ang paningkamot sa iyang anak nga makahuman sa kolehiyo bisan pa man nga pagpamasada lang ang iyang na-antiguhang panginabuhian rason nga kada-adlaw, maghulugan siya og kwartang papel sa alkansiya niyang puthaw.

Sama sa pagka-ugdaw sa ilang pinuy-anan, na-ugdaw usab ang iyang kahago ug paningkamot alang sa katumanan unta sa pangandoy sa iyang anak.