BUTUAN CITY – Kayang mahatag sa gobyerno ngadto sa mga Filipino ang tag-20 pisos nga kilo sa bugas kansa maoy dugay nang gi-atangan sa tanan human kini gisaad atol pa sa pagpangampanya kaniadto ni Pangulong Ferdinand Marcos Jr.
Kini kung ma-atiman lang og maayo sa gobyerno ang mga mag-uuma, ilabina ang ilang panginahanglanon.
Sa eksklusibong pakighinabi sa Bombo Radyo Butuan, gibutyag ni Agri partylist Rep. Wilbert Lee, gibutyag niining pinaka-maayong depensa batuk sa inflation sa nasud ang pagsuporta sa mga mag-uuma ug mapakita ang suporta ug pag-atiman sa gobyerno kanila pinaagi sa pagtabang nga mapataas ang ilang local production.
Higayong matuman lang kini, siguradong dili na matud pa unya magsalig ang Pilipinas sa mga imported rice tungod kay mubarato na man unyja ang presyo sa bugas ug uban pang mga palaliton ug mabati na dayon sa katawhan ang haruhay sa pamuyo.
Dugang ni Congressman Lee, matuman lang kini kung mahatag na ngadto sa mga mag-uuma ang ilang gikinahanglang assistance sa saktong panahon, pagpatukod og dugang post-harvest facilities, pagsiguro sa market linkages alang sa dalhan sa ilang mga produkto.
Kini matud pa ang rason sa giduso niyang House Bill No. 9020 aron masiguro nga sa ilang pag-ani, kaluha na niini ang ilang kita.
Ang maong balaudnon, magmando matud pa sa mga hingtungdang ahensya sa gobyerno nga mupalit og humay nga duna’y dugang patong gikan sa farmgate price.
