BUTUAN CITY-Posibleng mosaka og dako ang presyo sa mga produktong petrolyo sa sunod semana tungod sa padayon nga tensyon sa Middle East kansa nakaapekto sa global nga presyo sa lana.
Sumala ni Oil Industry Management Bureau Director Atty. Rino Abad, ang diesel mahimong mosaka og P19 matag litro, gasolina mo-usbaw hangtud P9 matag litro, ug ang kerosene P31 matag litro ang posibleng pag-usbaw, apan posible pa kini nga mas motaas tungod sa dugang nga gasto sama sa insurance ug premiums. Samtang gi-hangyo sa Department of Energy (DOE) ang mga kompanya sa lana nga hinay-hinayon ang pagpasaka aron dili makalitan ang mga motorista.
Gipasabot usab ni President Ferdinand Marcos Jr. nga makig-istorya kini sa Kongreso aron makab-ot ang gahom sa pag-ubos sa excise tax kon molapas sa $80 per barrel ang presyo sa Dubai crude.
Gipahimangnoan usab sa DOE ang mga gasolinahan nga mosunod sa fuel pricing rules ug anti-hoarding regulations human masakpan ang usa ka gasolinahan sa Tagum City nga nagtaas og presyo sa diesel, labaw sa gitudlong iskedyul. Gipahugtan na karon ang monitoring sa DOE uban ang Philippine National Police aron masiguro nga patas ug husto ang presyo ug suplay sa tibuok nasud
