BUTUAN CITY – Padayon ang follow-up operation aron ma-aresto na ang responsable sa pagtanom sa nadiskubrehang dakong plantasyon sa marijuana sa utlanan sa Brgy. Kasapa 1, lungsod sa Loreto, Agusan Del Sur sa Caraga Region ug sa Cabanglasan, Bukidnon Province, sa Region 10.
Kini human nga niadtong Sabado, dili moubos sa 12-milyones pesos nga kantidad sa mga marijuana plants ang nalarot ug nasunog sa mga otoridad sa Brgy. Kasapa Uno, lungsod sa Loreto, Agusan del Sur.
Sigon ni Police Regional Office kon PRO-13 regional director Chief Supt. Gilberto DC Cruz, ang maong Case Operational Plan kon COPLAN EVEREST operation gihimo human na-validate sa intelligence unit sa PNP ug nakumpirma ang presensiya sa plantasyon nga gitaho sa concerned citizen.
Ang mga personahe sa kapulisan gikan ning rehiyon, kasundaluhan og Philippine Drug Enforcement Agency sa Region 13 ug Region 10, nagbaktas ug 5 ka adlaw gikan sa point of entry sa Malabalay City, Bukidnon niadtong Enero 28, 2019, ngadto na sa lokasyon sa gikatahong plantasyon.
Ang nasangpit nga hiniusang operasyon, miresulta sa paglarot sa katibuk-ang 69,500 ka dagkong punuan na sa mga Marijuana plants sa unom ka managlahing plantasyon sa samang barangay.
Apan adiser pa sila naka-abot sa lugar, na-aresto sa tropa ang 3 ka mga lalaki sa may sitio Limao, Canangaan, Cabanglasan, Bukidnon tungod sa paglapas sa Cabanglasan Municipal Ordinance Number 05-04 nga gi-amendahan sa Ordinance Number 14-46 mahitungod sa curfew hours.
Sa gihimung pagrikisa sa lawas sa mga nadakpan, nakuha ang mga dahon sa marijuana og gi-turn over na ngadto sa Cabanglasan Municipal Police Station sa Bukidnon alang sa tukmang disposasyon ug pagpasaka sa kaso.
Sa ikalimang adlaw, mismo si P/Chief Supt. Cruz kauban si PDEA-Caraga regional director Aileen Lovitos, misakay sa private helicopter og naghatud og suplay nga pagkaon sa nag-operate nga tropa ug gipapauli usab ang 4 ka babayeng PDEA agents.
Sumala pa ni RD Cruz, hilabihan kalisud nga matud-an ang plantasyon sa marijuana tungod sa kalayu na niini nga anaa pa sa dagkong mga bukid, wala nay signal sa cellphone, ug impluwensiyado pa kini sa kumunistang New People’s Army. (Rolan Janea)
