BUTUAN CITY – Mukabat sa sien-mil pesos nga salaping cash ang nakuha sa Budol-Budol gang gikan sa usa ka ginang kagahapon sa alas-singko sa hapon samtang nag-grocery sulod sa Gaisano mall ning siyudad ka-uban ang iyang bana.
Sigon sa biktimang si Evelyn Pua, kabahin ang maong kantidad sa 390-mil pesos nga halin sa gibaligya nilang trak.
Gikuha matud pa sa iyang bana ang 90-mil pesos samtang gibayran ang ilang gikuhang mga grocery items samtang gibutang sa iyang bag ang 300-mil pesos.
Dihang milinya na sa cashier ang iyang bana, duna matud pa’y desenteng babaye nga mibangga kaniya nga gisundan sa lain pang usa kinsa nagduko na.
Posible matud pa nga sila ang mikuha sa usa ka bundle niya nga kwartang nagkantidad og sien-mil pesos tungod kay human sa maong insidente, namatikdan na niyang abli na og katunga ang zipper sa bag nga iyang gisudlan sa maong kwarta.
Disyamado ang maong ginang tungod kay wala niya laumi nga dili diay luwas ang pagdalikyat sa maong mall tungod sa nasangpit nga hitabo.
Kini matud pa ang unang higayon nga nakuutan siya tungod kay kanunay na siyang magbutang og kwarta sa iyang bag kondiin usahay magdala pa siya og usa ka milyon ka pesos.
Nasayrang kini na ang ikalima nga insidente sa pagpanguot nsa sentrong bahin lang ning siyudad kagahapong adlawa. (Beth Ruiz)
