BUTUAN CITY – Mukabat sa tunga sa milyon ka pesos nga balor sa mga hospital, medical ug surgical supplies ug equipment nga gikan pa sa Australia ang gisalig sa kongregasyon sa Faith Baptist Church nganhi sa Bombo Radyo Butuan aron maoy mupili sa mga ospital nga angayang hatagan niini sa ingon magamit ngadto sa ilang mga pasyenteng wala’y kakapas nga makapalit sa galamiton alang sa ilang pagpatambal.
Sigon ni Pastor Vicente Serrano, ang Bombo Radyo maoy ilang napili nga tugyanan sa nasangpit nga mga gamit human napamatud-ang daghan na og mga indibidwal nga natabangan ang sibyahan ilabina sa ilang panginahanglan nga lisod nilang ma-angkon tungod sa kawala’y kwartang magamit sa pagpalit niini.
Saysay pa ni Pastor Serrano, nakita usab nila nga dugukon sa katawhan ang nagkada-iyang klaseng hinabang nga itunol niini ilabina karong panahon sa pandemya.
Gidugang pa sa pastor nga dugay na kaayo siyang tigpaminawan sa Bombo Radyo ug aron dili maliso ang dial sa iyang radyo, iya na kining giplasteran.
Dako matud pa nilang kalipay ang pagpa-ambit sa mga grasyang itunol usab sa mga indibidwal nga gikan sa nagkada-iyang nasud sa kalibutan ngadto sa ilang simbahan.
Kini ang rason nga higayong ma-abtan sila og mga grasya, ila usab kining ipang-apod apod sa katawhan pinaagi sa Bombo Radyo Butuan.
Nasayrang dili lang kini ang unang higayong gihimo kini sa maong kongresgasyon tungod kay sukad pa kaniadto, daghan na sila og natunol nga mga ayuda ngadto sa mga tigpaminawan ug dili tigpaminawan ning sibyahan.
Ang pinaka-ulahi niini mao kadtong mga libreng reading eye glasses ug mga crutches nga ilang gipapalihok ning sibyahan ug natunol na ngadto sa mga nanginahanglan niini.
Nagtunol usab sila og mga personal protective equipment kon PPEs nga natunol ning sibyahan ngadto sa Butuan Medical Center niadtong unang mitumaw ang pandemyang hatud sa COVID-19.
