BUTUAN CITY – Naglaum ang mga Overseas Filipino Workers nga kasamtangang anaa sa Israel nga hingpit nang mahunong ang binuthanay sa maong nasod tali sa mga rebeldeng grupo, karong nadayon na ang dugay nang gipanubayan nga ceasefire deal tali sa Israel ug Hamas.
Sa pakighinabi ning sibyahan kang Bombo International Correspondent Marc Pleños, derekta gikan sa Til Aviv, Israel, hugot matud pa ang iyahang pagtuo nga moabot gayud ang panahon nga magkagubot na usab ang maong grupo, tungod sa ka daghan na matud pang panahon nga gibuan sa Hamas ang ilahang kasabutan tali sa Israel.
Sa kasamtangan matud pa, mga pag-ampo nalang ang ilahang mahimo nga dili na kini sublion sa Hamas arun magpadayun na ang nasinatiang kalinaw.
Dugang niini nga wala matud pay angay nga ikabalaka ang iyahang pamilya dinhia sa Pilipinas lakip na usab ang mga pamilya sa ubang mga OFW’s tungod kay luwas ra matud pa sila sa Israel tungod na usab sa mga advance military technology sa nasangpit nga nasod, kansa maoy ilahang kasaligan ugaling dunay matigayon nga mga pagpangatake.
Kahinummdumang kagahapon lang, nadayon na ang ceasefire sa Gaza, diin nakauli na usab ang kadaghanan sa mga Gazans sa ilahang mga nanga-gun-ob nga kabalayan tungod sa halos 15 ka bulan nga gyera.
